القربان بقلم اندرو الشريف

علاقتي مع الكاميرا كانت بالظبط زي علاقة الأب ببنته ومع كل نجاح بحققه عن طريق صورة أو فيديو انتشر وطلع تريند بنسب الفضل ده للكاميرا بنتي مش ليا أنا عارف إني غريب شوية بس صدقني طول ما في علاقة حب بينك وبين الكاميرا هتطلع صور عظيمة زيها زي حاجات تانية كتير وده مش مچنون دي حقيقة حقيقة أنا عيشت فيها سنين لحد ما اترشحت لمسابقة كبيرة اللي هيكسبها أو هيحقق مراكز أولى فيها هياخد مبلغ ضخم لكن انا مش من النوع اللي بحط ريسك على المراكز دي لأني مؤمن بحاجة بسيطة هي وان لو طموحك قليل عمرك ما هتوصل عشان كده أنا عيني كانت على المركز الأول أه الموضوع مش سهل لكن اللي يخليني اتأهل لمرحلة كبيرة زي دي يخليني اكسب واحقق طموحي واحلامي وعشان احققهم لازم الاقي مكان كويس اصور فيه فين هو.. هنعرف مع بعض اصل الكاميرا هي اللي بتختار مش أنا نزلت الشارع فضلت ادور على أماكن أثرية لقيتها كلها مهروسة وفي صور عظيمة ليها أه أنا ممكن اصور زيها لكن مش ده اللي هيميزني عن غيري اللي هيمزني حاجة جديدة وماتصورتش قبل كده وفي نفس الوقت الكاميرا تبقى مبسوطة وهي بتصور أصل أهم حاجة عندي هي انبساط حبيبتي نور.. الكاميرا.

في يوم كنت قاعد في البيت بفكر هعمل ايه الخطوة الجاية أو هروح فين وهصور ايه.. أسئلة كتير كانت جوة دماغي مش لقيلها اجابة والمسابقة كانت خلاص قربت وانا معايا صور متكررة ومحروقة متأهلنيش أنافس على المركز الأخيرة حتى وقتها الحزن اتملكني ماكنتش عارف أعمل ايه لحد ما جرس الشقة رن قومت فتحت لقيت شلبي واقف على الباب شلبي ده بقى يبقى أخويا مش صاحبي اتعرفت عليه عن طريق ايڤنت تصوير كبير بعدها اتقابلنا في المسابقة اللي أهلتني للتحدي اللي انا فيه دلوقتي مانكرش اني كنت خاېف منه لأنه مصور عظيم بس طول مانت خاېف عمرك ما هتوصل لربع اللي بتتمناه وقتها المسابقة عدت والنتيجة أعلنت الفايز فيها كان أنا من ساعتها وعلاقتي بشلبي مستمرة مع ان واحد غيره ممكن يزعل ويقطع معايا لكن بالعكس كان دايما سند ليا بيشجعني وبيديني ثقة في نفسي.. نرجع تاني للحظة فتح الباب ومن غير ما أقوله اتفضل اتمشى لأوضتي ودخل دخلت وراه وقفلت الباب لقيته قعد على السرير ومسك الكاميرا رفع عينه وقالي
ايه يا عم ربيع مالقتش حاجة تصورها لسه
قعدت على كرسي المكتب ورديت عليه بحزن
لسه.. كلها صور متكررة مافيش الحاجة اللي تخليني مستمتع بيها وتميزني عن غيري.
طب ماكلمتنيش ليه.. مش يمكن أنا عندي الحل
هخش أقولك ايه يعني يا شلبي قولي أماكن تصوير ما جوجل ماليان أنا اللي عايز حاجة